കണ്ണൂർ: സ്ഥാപനത്തിൽ നിന്നും വിശ്വാസവഞ്ചന നടത്തി സൂപ്പർവൈസറായ യുവതിയുംഭർത്താവും ചേർന്ന് ഒരു കോടി 40 ലക്ഷം രൂപ തട്ടിയെടുത്തു വഞ്ചിച്ച കേസിൽ അറസ്റ്റിൽ. കണ്ണൂർ ചൊവ്വ ഉരുവച്ചാൽ സ്പിന്നിംഗ് മില്ലിന് സമീപത്തെ വിദ്യാനിലയത്തിൽ കെ.സുഖില (48), ഭർത്താവ് വിനോദ് (49) എന്നിവരെയാണ് ടൗൺ പോലീസ് അറസ്റ്റു ചെയ്തത്. സൗദി അറേബ്യയിൽ താമസിക്കുന്നകണ്ണൂർ ശാന്തി കോളനിയിലെ സാജിത മൻസിലിൽ ഡോ. മൻസൂർ അഹമ്മദ് ചപ്പൻ എന്ന ഡോ. സി.വി. കുഞ്ഞഹമ്മദിൻ്റെ പരാതിയിൽ 2025 സപ്തംബർ രണ്ടിനായിരുന്നു ടൗൺ പോലീസ് കേസെടുത്തിരുന്നത്.
പരാതിക്കാരൻ്റെ കണ്ണൂർ പള്ളിക്കുന്നിലെ ഷെറി ബുക്സ് ആൻ്റ് സ്റ്റേഷനറി ഷെറി ആയൂർ വേദിക്സ്, റെയിൽവെ മുത്തപ്പൻ കാവിനടുത്തുള്ള ഷെറി കോമൺ സർവീസ് സെൻ്റർ ചാലാടുള്ള ഷെറി ഹെൽത്ത് കെയർ സെൻ്റർ ,ഷെറി ട്രേഡേർസ് എന്നീ സ്ഥാപനങ്ങളുടെ സൂപ്പർവൈസർ ആയ ഒന്നാം പ്രതിയും ഭർത്താവും
2024 ആഗസ്റ്റ് മാസം മുതൽ മേൽ സ്ഥാപനത്തിൽ നിന്നും പണമായും അക്കൗണ്ട് മുഖേനയും ഒരു കോടി 40 ലക്ഷം രൂപ കൈവശപ്പെടുത്തി വഞ്ചിച്ചുവെന്ന് കാണിച്ച് ജില്ല പോലീസ് മേധാവിക്ക് നൽകിയ പരാതിയുടെ അടിസ്ഥാനത്തിൽ കേസെടുത്ത പോലീസ് അന്വേഷണത്തിനിടെ ഇന്നലെ പ്രതികളെ അറസ്റ്റു ചെയ്തു. കോടതിയിൽ ഹാജരാക്കിയ പ്രതികളെ റിമാൻ്റ് ചെയ്തു.