പാൻ കാർഡും ആധാർ കാർഡും തമ്മില് ബന്ധിപ്പിക്കുന്നതിനുള്ള സമയപരിധി അവസാനിക്കാൻ ഇനി ദിവസങ്ങള് മാത്രം.2025 ഡിസംബർ 31-നകം നടപടികള് പൂർത്തിയാക്കിയില്ലെങ്കില് 2026 ജനുവരി ഒന്ന് മുതല് പാൻ കാർഡ് പ്രവർത്തനരഹിതമാകും. ആദായനികുതി വകുപ്പിന്റെ കർശന നിർദ്ദേശപ്രകാരം ഡിസംബർ 31-ന് ശേഷം ലിങ്ക് ചെയ്യാത്ത പാൻ കാർഡുകള് ഉപയോഗിച്ച് സാമ്ബത്തിക ഇടപാടുകള് നടത്താൻ സാധിക്കില്ല.
സാമ്ബത്തിക പ്രത്യാഘാതങ്ങള്,
സെൻട്രല് ബോർഡ് ഓഫ് ഡയറക്ട് ടാക്സസ് (CBDT) പുറപ്പെടുവിച്ച മുന്നറിയിപ്പ് പ്രകാരം, സമയപരിധി കഴിഞ്ഞാല് ഗുരുതരമായ സാമ്ബത്തിക പ്രത്യാഘാതങ്ങള് നികുതിദായകർ നേരിടേണ്ടി വരും. പാൻ കാർഡ് നിർജീവമായാല് ആദായനികുതി റീഫണ്ടുകള് തടയപ്പെടും. മാത്രമല്ല, സ്രോതസ്സില് നിന്നുള്ള നികുതി (TDS), ടിസിഎസ് (TCS) എന്നിവ ഉയർന്ന നിരക്കില് ഈടാക്കാനും നിയമം അനുവദിക്കുന്നുണ്ട്. ഇത് സാമ്ബത്തിക ഇടപാടുകളെ സാരമായി ബാധിക്കും.
വിജ്ഞാപനത്തിലെ നിർദ്ദേശങ്ങള്
2025 ഏപ്രില് 3-ന് പുറത്തിറക്കിയ വിജ്ഞാപനം നമ്ബർ 26/2025 പ്രകാരം, 2024 ഒക്ടോബർ ഒന്നിന് മുൻപ് ആധാർ എൻറോള്മെന്റ് ഐഡി ഉപയോഗിച്ച് പാൻ കാർഡ് അനുവദിച്ചവർ 2025 അവസാനത്തോടെ നിർബന്ധമായും ആധാർ നമ്ബറുമായി ലിങ്ക് ചെയ്യേണ്ടതുണ്ട്. 2017 ജൂലൈ ഒന്നിന് മുൻപ് പാൻ കാർഡ് ലഭിച്ചവരും ഇതുവരെ ലിങ്ക് ചെയ്യാത്തവരുമായ ആളുകള്ക്ക് 1,000 രൂപ പിഴ അടച്ചുകൊണ്ട് മാത്രമേ ഇനി ലിങ്കിങ് പൂർത്തിയാക്കാൻ സാധിക്കൂ.
പാൻ-ആധാർ എങ്ങനെ ലിങ്ക് ചെയ്യാം?
ആദായനികുതി വകുപ്പിന്റെ ഔദ്യോഗിക ഇ-ഫയലിങ് പോർട്ടല് വഴി എളുപ്പത്തില് ഈ നടപടി പൂർത്തിയാക്കാം. ഇതിനായി ആദ്യം https://www(dot)incometax(dot)gov(dot)in/iec/foportal/ എന്ന വെബ്സൈറ്റില് പ്രവേശിക്കുക. തുടർന്ന് ഹോം പേജിലെ ‘Quick Links’ വിഭാഗത്തില് നിന്ന് ‘Link Aadhaar’ എന്ന ഓപ്ഷൻ തിരഞ്ഞെടുക്കുക. ഇവിടെ പാൻ നമ്ബറും ആധാർ നമ്ബറും കൃത്യമായി രേഖപ്പെടുത്തുക.
പണമടയ്ക്കേണ്ട രീതി
അടുത്ത ഘട്ടമായി ‘E-Pay Tax’ വഴി പണമടയ്ക്കാനുള്ള ഓപ്ഷൻ തിരഞ്ഞെടുക്കുക. വീണ്ടും പാൻ നമ്ബർ നല്കി മൊബൈല് ഒടിപി വഴി വെരിഫൈ ചെയ്യുക. തുടർന്ന് ‘Income Tax’ എന്ന ഓപ്ഷൻ തിരഞ്ഞെടുത്ത് മുന്നോട്ട് പോവുക. അസസ്മെന്റ് ഇയർ (Assessment Year) കൃത്യമായി തിരഞ്ഞെടുത്ത ശേഷം പേയ്മെന്റ് കാറ്റഗറിയില് ‘Other Receipts (500)’ എന്നത് സെലക്ട് ചെയ്യുക. 1,000 രൂപ എന്ന തുക ഓട്ടോമാറ്റിക്കായി വരും. നെറ്റ് ബാങ്കിങ്, ഡെബിറ്റ് കാർഡ് അല്ലെങ്കില് യുപിഐ ഉപയോഗിച്ച് പണമടയ്ക്കാം.