കൊച്ചി: രാജ്യത്ത് പെട്രോൾ, ഡീസൽ വില കൂട്ടി ഇന്ത്യയിലെ ഏറ്റവും വലിയ സ്വകാര്യ എണ്ണക്കമ്പനിയായ നയാര എനർജി. പെട്രോളിന് ഒറ്റയടിക്ക് ലിറ്ററിന് അഞ്ചുരൂപയും ഡീസലിന് മൂന്ന് രൂപയുമാണ് വർധിപ്പിച്ചത്. ഇതോടെ കൊച്ചിയിൽ പെട്രോളിന് 118.89 രൂപയും ഡീസലിന് 105.50 രൂപയുമായി. (പൊതുമേഖലയിലെ ഇന്ധനവില: പെട്രോൾ-115.49 രൂപ, ഡീസൽ: 104.40 രൂപ)
ക്രൂഡ് ഓയിൽ വില ഉയർന്നതിനെ തുടർന്ന് മാർച്ചിൽ നയാര ഇന്ധനവില വർധിപ്പിച്ചിരുന്നെങ്കിലും പിന്നീട് ക്രൂഡ് വില താഴ്‌ന്നതോടെ വില കുറച്ചിരുന്നു. പശ്‌ചിമേഷ്യൻ സംഘർഷം വീണ്ടും രൂക്ഷമായതോടെ ക്രൂഡ് ഓയിൽ വില വീണ്ടും ഉയരുന്നതാണ് ഇപ്പോഴത്തെ വില വർധനയ്‌ക്ക് കാരണം.
മേയ് മാസത്തിൽ പെട്രോളിനും ഡീസലിനും എട്ടുരൂപ വീതം പൊതുമേഖലാ എണ്ണക്കമ്പനികൾ വർധിപ്പിച്ചിരുന്നു. കൊച്ചിയിൽ പെട്രോൾ വില 113.63 രൂപയും ഡീസലിന് 102.54 രൂപയുമാണ് വില. ഇന്ത്യയിൽ 90% പമ്പുകളും പൊതുമേഖലാ എണ്ണക്കമ്പനികളായ ഇന്ത്യൻ ഓയിൽ (ഐഒസി), ഭാരത് പെട്രോളിയം (ബിപിസിഎൽ), ഹിന്ദുസ്‌ഥാൻ പെട്രോളിയം (എച്ച്പിസിഎൽ) എന്നിവരുടെ കീഴിലാണ്. ഇന്ത്യയിലാകെ 1.04 ലക്ഷം പെട്രോൾ പമ്പുകളുണ്ട്.