ഉളിക്കൽ : കണ്ണൂർ ഉളിക്കൽ ടൗണിൽ ഇന്ന് ഉച്ചയ്ക്ക് 12.30ഓടെയുണ്ടായ ശക്തമായ ചുഴലിക്കാറ്റിൽ വൻ നാശനഷ്ടം. മഴയ്ക്കൊപ്പമുണ്ടായ ശക്തമായ കാറ്റിലാണ് വയത്തൂർ യുപി സ്കൂളിന്റെ ആർച്ച് രൂപത്തിലുള്ള മേൽക്കൂര പറന്നുപോയത്.
പറന്നുപോയ മേൽക്കൂര സ്കൂളിന് പിന്നിലെ കെട്ടിടത്തിന് മുകളിൽ പതിച്ചു. കെട്ടിടത്തിന് താഴെ നിർത്തിയിട്ടിരുന്ന മൂന്ന് കാറുകൾക്കും വലിയ നാശനഷ്ടമുണ്ടായി. കാറ്റിന്റെ ശക്തി കണക്കിലെടുക്കുമ്പോൾ ആളപായമില്ലാത്തത് വലിയ ദുരന്തം ഒഴിവാക്കിയതായി നാട്ടുകാർ പറഞ്ഞു.
ഏകദേശം 15 വർഷം മുൻപ് നിർമ്മിച്ച സ്കൂളിന്റെ ആർച്ച് മേൽക്കൂരയാണ് കാറ്റിൽ പറന്നുപോയത്. മേൽക്കൂര കെട്ടിടത്തിന് മുകളിൽ പതിച്ചതിന് പിന്നാലെ വാഹനങ്ങൾ അതിനടിയിൽ കുടുങ്ങിയിരുന്നു. പിന്നീട് സ്ഥലത്തെത്തിയവർ വാഹനങ്ങൾ മേൽക്കൂരയ്ക്കടിയിൽ നിന്ന് മാറ്റി.
കാറുകൾക്കും കെട്ടിടത്തിനുമായി ലക്ഷക്കണക്കിന് രൂപയുടെ നാശനഷ്ടമുണ്ടായതായാണ് പ്രാഥമിക വിവരം.
ഇരിട്ടി മേഖലയിലും മലയോരത്തിന്റെ വിവിധ ഭാഗങ്ങളിലും ശക്തമായ കാറ്റ് വീശിയതായി റിപ്പോർട്ടുണ്ട്. വിവിധയിടങ്ങളിൽ ചുഴലിക്കാറ്റിനെ തുടർന്ന് പലവിധ നാശനഷ്ടങ്ങളും ഉണ്ടായിട്ടുണ്ട്.