പാലക്കാട്: കൊഴിഞ്ഞാമ്പാറയില് സഹോദരങ്ങളായ രണ്ട് കുരുന്നുകളെ വീടിനുമുന്നിലെ കുളിമുറിയിലെ സിമന്റ് വെള്ളത്തൊട്ടിയില് മരിച്ച നിലയില് കണ്ടെത്തിയ സംഭവം കൊലപാതകമെന്ന് പൊലീസ് സ്ഥിരീകരിച്ചു.കുട്ടികളുടെ അമ്മയായ നിവേദ്യ കുറ്റം സമ്മതിച്ചതായി പൊലീസ് വ്യക്തമാക്കിയിട്ടുണ്ട്. അഞ്ച് വയസ്സുകാരിയായ ജെനിഫറും മൂന്നു വയസ്സുകാരനായ റോബിനുമാണ് ദാരുണമായി കൊല്ലപ്പെട്ടത്. കുട്ടികളുടെ പോസ്റ്റ്മോർട്ടം നടപടികള് പൂർത്തിയായതിന് പിന്നാലെ പൊലീസ് നടത്തിയ വിശദമായ ചോദ്യം ചെയ്യലിലാണ് ഇവർ കുറ്റസമ്മതം നടത്തിയത്. നിലവില് നിവേദ്യയെ പൊലീസ് കസ്റ്റഡിയില് എടുത്തിട്ടുണ്ട്.
കുട്ടികളുടെ അച്ഛൻ ജോണ് കുമാർ ജോലിക്ക് പുറത്തുപോയ സമയത്തായിരുന്നു ഈ ദാരുണ സംഭവം നടന്നത്. രണ്ട് കുട്ടികളും ഒരുമിച്ച് വീടിന് മുന്നിലെ സിമന്റ് ടാങ്കില് വീണതില് ആദ്യംമുതല് തന്നെ പൊലീസിന് ദുരൂഹത തോന്നിയിരുന്നു. ഇതിന്റെ അടിസ്ഥാനത്തില് നടത്തിയ അന്വേഷണവും ചോദ്യം ചെയ്യലുമാണ് ഇപ്പോള് കൊലപാതക വിവരം പുറത്തുകൊണ്ടുവന്നത്. കുട്ടികളെ കൊലപ്പെടുത്താനുള്ള യഥാർത്ഥ കാരണം എന്താണെന്നത് സംബന്ധിച്ച് പൊലീസിന്റെ അന്വേഷണം പുരോഗമിക്കുകയാണ്