കോട്ടയം: ജില്ലയിൽ നാലുവയസുകാരന് ഷിഗെല്ല സ്ഥിരീകരിച്ചു. അതിരമ്പുഴ സ്വദേശിയായ കുട്ടിക്കാണ് രോഗബാധ. കഴിഞ്ഞ കുറച്ചു ദിവസമായി കുട്ടിക്ക് ആരോഗ്യ പ്രശ്നങ്ങൾ ഉണ്ടായിരുന്നു. വയറിളക്കം, കടുത്ത പനി, വയറുവേദന, ഛർദി എന്നിവയെ തുടർന്ന് ഈമാസം എട്ടിനാണ് കോട്ടയത്തെ സ്വകാര്യ ആശുപത്രിയിൽ പ്രവേശിപ്പിച്ചത്.
തുടർന്ന് നടത്തിയ പരിശോധനയിലാണ് ഷിഗെല്ല സ്ഥിരീകരിച്ചത്. നിലവിൽ കുട്ടിയുടെ ആരോഗ്യനില തൃപ്തികരമാണെന്ന് ആരോഗ്യവകുപ്പും ഡോക്ടർമാരും അറിയിച്ചു. എവിടെ നിന്നാണ് കുട്ടിക്ക് രോഗബാധയുണ്ടായതെന്ന് കണ്ടെത്താൻ അന്വേഷണം ആരംഭിച്ചിട്ടുണ്ട്.
മലിനമായ ഭക്ഷണം, വെള്ളം എന്നിവയിലൂടെയാണ് ഷിഗെല്ല രോഗം പരത്തുന്ന ബാക്ടീരിയ ശരീരത്തിൽ എത്തുന്നത്. അസുഖബാധിതനായ കുട്ടി ഉൾപ്പടെയുള്ള കുടുംബാംഗങ്ങൾ ഓഗസ്റ്റ് ആറിന് ഹോട്ടലിൽ നിന്ന് ചിക്കൻ മാന്തി വാങ്ങി കഴിച്ചിരുന്നു. ഈ ആഹാരത്തിലൂടെയാണ് അസുഖം പിടിപെട്ടതെന്ന് സംശയിക്കുന്നു.