ഇൻസ്റ്റഗ്രാമിലൂടെ പരിചയപ്പെട്ട 14 വയസുള്ള രണ്ട് വിദ്യാർത്ഥിനികളെ ലൈംഗികമായി പീഡിപ്പിച്ച പ്രതി പിടിയില്. കണ്ണൂർചപ്പാരപ്പടവ് തിരുക്കുളം സ്വദേശി കെ വി അനുരാജ് (23) ആണ് തിരുവനന്തപുരം പോത്തൻകോട് പോലീസിന്റെ പിടിയിലായത്.
ഇൻസ്റ്റഗ്രാം വഴി പരിചയപ്പെട്ട ഒമ്പതാം ക്ലാസ് വിദ്യാർത്ഥിനികളെയാണ് ഇയാള് വീട്ടിലെത്തി പീഡിപ്പിച്ചത്. പ്രണയം നടിച്ച് വിദ്യാർത്ഥിനികളുടെ നഗ്ന ദൃശ്യങ്ങളും ഇയാള് പകർത്തി.
പെണ്കുട്ടികളില് ഒരാളെ ആദ്യം പരിചയപ്പെട്ട പ്രതി പിന്നീട് കൂട്ടുകാരിയുമായും പരിചയത്തിലായി. ഇരുവരുമായും പ്രണയം നടിച്ച് ലൈംഗിക ബന്ധത്തിനായി കണ്ണൂരില് നിന്നും പോത്തൻകോട് എത്തി. വീട്ടില് ആളില്ലാതിരുന്ന സമയത്ത് അതിജീവിയുടെ വീട്ടിനകത്ത് കയറിയ ഇയാള് അതിജീവിതയെ പീഡിപ്പിച്ചു. തുടർന്ന് അതിജീവിതയുടെ ഇൻസ്റ്റഗ്രാം ഐഡി ഉപയോഗിച്ച് കൂട്ടുകാരിയെയും വിളിച്ചുവരുത്തുകയായിരുന്നു. ഇരുവരെയും പീഡിപ്പിച്ചശേഷം രാത്രി 12 മണിയോടെ വീട്ടുകാർ ഉറങ്ങിയപ്പോള് പ്രതി സ്ഥലം വിട്ടു.
സംഭവത്തിന് ശേഷം ഇരുവരുടെയും ഇൻസ്റ്റഗ്രാം ഐഡി ഇയാള് ബ്ലോക്ക് ചെയ്തു. ഇയാള് മറ്റൊരു പെണ്കുട്ടിയുമായി പ്രണയത്തില് ആയതോടെയാണ് സംഭവം പുറത്തറിഞ്ഞത്. ആദ്യത്തെ പെണ്കുട്ടിയുടെ വീട്ടുകാർ പോത്തൻകോട് പോലീസില് പരാതി നല്കിയതോടെയാണ് രണ്ടാമത്തെ കുട്ടിയുടെ വിവരവും പുറത്തറിഞ്ഞത്. തുടർന്ന് രണ്ടു കേസുകള് രജിസ്റ്റർ ചെയ്തു. കണ്ണൂരിലെത്തിയാണ് പോത്തൻകോട് പോലീസ് പ്രതിയെ അറസ്റ്റ് ചെയ്തത്. ഇയാള്ക്കെതിരെ നിലവില് രണ്ട് പോക്സോ കേസുകള് തളിപ്പറമ്പ് സ്റ്റേഷനിലുണ്ടെന്ന് പോലീസ് അറിയിച്ചു.