കൊച്ചി: കെ.വൈ.സി (KYC) അപ്ഡേഷന്റെ പേരിൽ നടക്കുന്ന ഓൺലൈൻ തട്ടിപ്പുകൾക്കെതിരെ ഉപഭോക്താക്കൾക്ക് കർശന ജാഗ്രതാ നിർദേശവുമായി റിസർവ് ബാങ്ക് ഓഫ് ഇന്ത്യ (ആർ.ബി.ഐ). "ഉടൻ കെ.വൈ.സി പുതുക്കിയില്ലെങ്കിൽ ബാങ്ക് അക്കൗണ്ട് റദ്ദാകും" എന്ന തരത്തിൽ വ്യാജ സന്ദേശങ്ങൾ അയച്ചാണ് തട്ടിപ്പുകാർ പണം തട്ടുന്നത്.
ഭയം സൃഷ്ടിച്ച് ലിങ്കുകളിൽ ക്ലിക്ക് ചെയ്യിക്കുകയാണ് ഇത്തരം സംഘങ്ങളുടെ രീതി. ഉപഭോക്താക്കൾ താഴെ പറയുന്ന സുരക്ഷാ നിർദേശങ്ങൾ കർശനമായി പാലിക്കണമെന്ന് ആർ.ബി.ഐ അറിയിച്ചു:
* തിരക്ക് കൂട്ടരുത്: അടിയന്തരമായി നടപടിയെടുക്കണമെന്ന് ആവശ്യപ്പെടുന്ന അജ്ഞാത സന്ദേശങ്ങളോട് ഉടൻ പ്രതികരിക്കരുത്.
* ലിങ്കുകളിൽ ക്ലിക്ക് ചെയ്യരുത്: കെ.വൈ.സി വിവരങ്ങൾ പുതുക്കാനായി ബാങ്കുകളോ ബാങ്കിങ് ഇതര ധനകാര്യ സ്ഥാപനങ്ങളോ (NBFC) ഒരിക്കലും ലിങ്കുകൾ അടങ്ങിയ എസ്.എം.എസുകൾ അയക്കാറില്ല.
* രഹസ്യ വിവരങ്ങൾ കൈമാറരുത്: ഒ.ടി.പി, യു.പി.ഐ പിൻ, പാസ്വേഡുകൾ എന്നിവ ബാങ്ക് ഉദ്യോഗസ്ഥരുൾപ്പെടെ ആരുമായും പങ്കുവെക്കരുത്.
* ബാങ്കുമായി ബന്ധപ്പെടുക: അക്കൗണ്ടുമായി ബന്ധപ്പെട്ട സംശയങ്ങൾക്ക് ബാങ്കിന്റെ ഔദ്യോഗിക ശാഖയുമായോ കസ്റ്റമർ കെയർ നമ്പറിലോ മാത്രം ബന്ധപ്പെടുക.
അജ്ഞാത സന്ദേശങ്ങളിലെ സംശയാസ്പദമായ ലിങ്കുകൾ വലിയ സാമ്പത്തിക നഷ്ടത്തിന് വഴിവെക്കുമെന്നും കൂടുതൽ വിവരങ്ങൾക്ക് ആർ.ബി.ഐയുടെ ഔദ്യോഗിക പോർട്ടൽ (https://m.rbi.org.in/FinancialEducation/) സന്ദർശിക്കാമെന്നും അധികൃതർ വ്യക്തമാക്കി.