സംസ്ഥാനത്തെ ഹയർ സെക്കൻഡറി പ്ലസ് വൺ പ്രവേശനത്തിന്റെ രണ്ടാം സപ്ലിമെന്ററി അലോട്ട്മെന്റിനായുള്ള ഒഴിവ് സീറ്റുകളുടെ പട്ടിക പ്രസിദ്ധീകരിച്ചു.
ഇതുവരെ അലോട്ട്മെന്റ് ലഭിക്കാത്ത വിദ്യാർഥികൾക്കും ആദ്യഘട്ടത്തിൽ അപേക്ഷ സമർപ്പിക്കാത്തവർക്കും ആഗസ്റ്റ് 1 വൈകിട്ട് 4 മണിവരെ അപേക്ഷ പുതുക്കാനോ പുതിയ അപേക്ഷ സമർപ്പിക്കാനോ അവസരമുണ്ട്.
ഒഴിവുകളുടെ പട്ടിക പരിശോധിച്ച് അതിൽ ഉൾപ്പെട്ട സ്കൂളുകളും കോമ്പിനേഷനുകളും മാത്രം പുതിയ ഓപ്ഷനുകളായി തിരഞ്ഞെടുക്കാനാകും.
അപേക്ഷിച്ചിട്ടും ഇതുവരെ അലോട്ട്മെന്റ് ലഭിക്കാത്തവർ 'Candidate Login – SWS' വഴി Renew Application ഉപയോഗിച്ച് അപേക്ഷ പുതുക്കണം.
ഇതുവരെ അപേക്ഷിക്കാത്തവർ Create Candidate Login – SWS വഴി ലോഗിൻ സൃഷ്ടിച്ച ശേഷം Apply Online – SWS ഉപയോഗിച്ച് പുതിയ അപേക്ഷ സമർപ്പിക്കണം. അപേക്ഷയിലെ തെറ്റായ വിവരങ്ങൾ കാരണം പ്രവേശനം നിഷേധിക്കപ്പെട്ടവർക്ക് അതേ Renew Application സൗകര്യം ഉപയോഗിച്ച് വിവരങ്ങൾ തിരുത്തി വീണ്ടും അപേക്ഷിക്കാം. അപേക്ഷ പുതുക്കാത്തവരെ രണ്ടാം സപ്ലിമെന്ററി അലോട്ട്മെന്റിൽ പരിഗണിക്കില്ല.
നിലവിൽ പ്രവേശനം നേടിയ വിദ്യാർഥികൾക്കും, പ്രവേശനം ലഭിച്ചിട്ടും ഹാജരാകാത്തവർക്കും (Non-Join), പ്രവേശനത്തിന് ശേഷം ടി.സി. വാങ്ങിയവർക്കും ഈ ഘട്ടത്തിൽ അപേക്ഷ നൽകാൻ കഴിയില്ല.