കണ്ണൂർ: കണ്ണൂർ ജില്ലയുടെ പുതിയ കളക്ടറായി പി. വിഷ്ണുരാജ് ചുമതലയേറ്റു. കളക്ടറേറ്റിലെ ചേംബറിൽ നടന്ന ഔദ്യോഗിക ചടങ്ങിൽ വെച്ച് സ്ഥാനമൊഴിയുന്ന കളക്ടർ അരുൺ കെ. വിജയനിൽ നിന്നും അദ്ദേഹം ചുമതലകൾ ഏറ്റുവാങ്ങി.
വ്യവസായ വകുപ്പ് ഡയറക്ടറായി സേവനമനുഷ്ഠിച്ച് വരികയായിരുന്ന പി. വിഷ്ണുരാജിനെ കഴിഞ്ഞ ദിവസമാണ് സംസ്ഥാന സർക്കാർ കണ്ണൂർ ജില്ലാ കളക്ടറായി നിയമിച്ചുകൊണ്ട് ഉത്തരവിറക്കിയത്. സ്ഥാനമൊഴിയുന്ന കണ്ണൂർ കളക്ടർ അരുൺ കെ. വിജയനെ വ്യവസായ വകുപ്പ് ഡയറക്ടറായും സർക്കാർ നിയമിച്ചിട്ടുണ്ട്. പരസ്പരം ചുമതലകൾ കൈമാറിയാണ് ഇരുവരും പുതിയ പദവികളിലേക്ക് കടക്കുന്നത്.