കോഴിക്കോട്: പേരാമ്പ്രയിൽ ഓടിക്കൊണ്ടിരുന്ന കാറിന് തീപിടിച്ച് ഗര്ഭിണി വെന്തുമരിച്ചു . ചെറുവണ്ണൂർ കക്കറമുക്കിലാണ് അപകടം. റിജിൻലാലിൻ്റെ ഭാര്യ പൂവത്തുംചാലിൽ സോന (27) ആണ് മരിച്ചത്. കാർ ഓടിച്ച റിജിൻലാലിന് ഗുരുതരമായി പൊള്ളലേറ്റിട്ടുണ്ട്. ഇയാൾ കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിലാണ്.വെള്ളിയാഴ്ച രാത്രി ഒൻപതോടെ കക്കറമുക്ക് റോഡിലാണ് അപകടമുണ്ടായത്. സോന ആറു മാസം ഗർഭിണിയായിരുന്നു. സോനയെ ആശുപത്രിയിൽ കാണിച്ച് വീട്ടിലേക്ക് മടങ്ങുന്നതിനിടെയാണ് കാർ കത്തിയമർന്നത്. റോഡിലൂടെ പോവുന്ന കാറിൽനിന്ന് തീയും പുകയും ഉയരുന്നത് ശ്രദ്ധയിൽപ്പെട്ട ഉടൻ നാട്ടുകാർ സ്ഥലത്തേക്ക് ഓടിയെത്തുകയായിരുന്നു.
തീപിടിച്ചയുടനെ കാറിൽനിന്ന് പുറത്തിറങ്ങി ഡ്രൈവർ സീറ്റിൽ നിന്ന് റിജിൻ പുറത്തിറങ്ങി. പിൻസീറ്റിൽ ഇരുന്നിരുന്ന സോനയെ കാറിൽനിന്ന് ഇറക്കാൻ ശ്രമിച്ചെങ്കിലും ഡോർ ലോക്കായതിനാൽ സാധിച്ചില്ല. തൊട്ടടുത്ത വയലിൽനിന്ന് വെള്ളം കോരിയൊഴിച്ച് നാട്ടുകാർ തീയണയ്ക്കാനും സോനയെ പുറത്തെടുക്കാനും ശ്രമിച്ചെങ്കിലും സാധിച്ചില്ല. റിജിൻലാൽ സമീപത്തെ തോട്ടിൽ ഇറങ്ങിയാണ് വസ്ത്രത്തിൽ പിടിച്ച തീയണച്ചത്. ഉടൻ തന്നെ ഇയാളെ കോഴിക്കോട് മെഡിക്കൽ കോളജ് ആശുപത്രിയിലേക്കു കൊണ്ടുപോയി.പേരാമ്പ്രയിൽനിന്ന് ഫയർഫോഴ്സ് സ്ഥലത്ത് എത്തിയ ശേഷമാണ് സോനയുടെ മൃതദേഹം പുറത്തെടുത്തത്. കാറിൻ്റെ മുൻഭാഗത്ത് വലിയ തോതിൽ തീപിടിച്ചിട്ടില്ല. സോനയുടെ മൃതദേഹം പേരാമ്പ്ര കല്ലോട് ആശുപത്രിയിലേക്ക് മാറ്റി. ഇതേ ആശുപത്രിയിൽ സോനയെ കാണിച്ച ശേഷം വീട്ടിലേക്ക് മടങ്ങവെയാണ് കാറിൽ തീപിടിത്തം ഉണ്ടായത്.മൂന്നുവർഷം മുൻപായിരുന്നു ഇവരുടെ വിവാഹം. വിദേശത്തായിരുന്ന റിജിൻലാൽ ഒരുമാസം മുൻപാണ് നാട്ടിലെത്തിയത്. മേപ്പയൂർ പോലീസും ഫയർഫോഴ്സും സംഭവത്തിൽ അന്വേഷണം ആരംഭിച്ചു. പാലേരി കുയിമ്പിൽപ്പാലം കല്ലിക്കണ്ടിമീത്തൽ ശ്രീനിവാസൻ്റെയും വസന്തയുടെയും മകളാണ് സോന. സഹോദരൻ: സോനു