തിരുവനന്തപുരം: കേരളത്തില് വേനല്ച്ചൂട് കഠിനമാകുന്നു. എട്ട് ജില്ലകളില് ശരാശരി താപനിലയേക്കാള് കൂടുതല് ചൂട് അനുഭവപ്പെടാന് സാധ്യതയുള്ളതിനാല് കേന്ദ്ര കാലാവസ്ഥാ വകുപ്പ് യെല്ലോ അലര്ട്ട് പ്രഖ്യാപിച്ചു.
പാലക്കാട് ജില്ലയില് താപനില 38°C വരെയും കൊല്ലം, കോട്ടയം, പത്തനംതിട്ട ജില്ലകളില് 37°C വരെയും ഉയരാന് സാധ്യതയുണ്ടെന്നാണ് പ്രവചനം.
തിരുവനന്തപുരം, ആലപ്പുഴ, എറണാകുളം, തൃശൂര് ജില്ലകളില് താപനില 36°C വരെ ഉയര്ന്നേക്കാം. ഉയര്ന്ന താപനിലയോടൊപ്പം അന്തരീക്ഷത്തില് ഈര്പ്പം കൂടുന്നതിനാല് മലയോര മേഖലകളൊഴികെയുള്ള സ്ഥലങ്ങളില് കടുത്ത അസ്വസ്ഥതയ്ക്കും സാധ്യതയുണ്ട്.
അതേസമയം, വേനല്ച്ചൂടിനിടെ ആശ്വാസമായി ശനിയാഴ്ച വരെ സംസ്ഥാനത്ത് ഒറ്റപ്പെട്ടയിടങ്ങളില് ഇടിമിന്നലോടു കൂടിയ മഴയ്ക്കും സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു.