തിരുവനന്തപുരം.സംസ്ഥാനത്ത് വേനല്ച്ചൂട് കഠിനമാകുമെന്ന മുന്നറിയിപ്പുമായി കേന്ദ്ര കാലാവസ്ഥാ വകുപ്പ്.വരും ദിവസങ്ങളില് വിവിധ ജില്ലകളില് താപനില സാധാരണയേക്കാള് 2 മുതല് 3 ഡിഗ്രി സെല്ഷ്യസ് വരെ ഉയരാൻ സാധ്യതയുണ്ടെന്നാണ് റിപ്പോർട്ടുകള് സൂചിപ്പിക്കുന്നത്.
ഏപ്രില് 14 വരെ കൊല്ലം, പാലക്കാട്, കോഴിക്കോട്, കാസർകോട് ജില്ലകളില് താപനില 38°C വരെയും, ആലപ്പുഴ, കോട്ടയം, എറണാകുളം, തൃശൂർ, കണ്ണൂർ ജില്ലകളില് 37°C വരെയും ഉയരാൻ സാധ്യതയുണ്ട്. പത്തനംതിട്ടയില് താപനില 36°C വരെ എത്തിയേക്കാം.
ഉയർന്ന ചൂടിനൊപ്പം അന്തരീക്ഷത്തിലെ ഈർപ്പവും വർധിക്കുന്നത് മലയോര മേഖലകളൊഴികെയുള്ള പ്രദേശങ്ങളില് കടുത്ത അസ്വസ്ഥതയ്ക്ക് കാരണമായേക്കും. സൂര്യപ്രകാശത്തിലെ അള്ട്രാവയലറ്റ് രശ്മികള് നേരിട്ട് ശരീരത്തില് ഏല്ക്കുന്നത് സൂര്യാതപം, ത്വക്ക് രോഗങ്ങള്, നേത്രരോഗങ്ങള് എന്നിവയ്ക്ക് വഴിതെളിക്കുമെന്നതിനാല് പൊതുജനങ്ങള് കർശന സുരക്ഷാ മുൻകരുതലുകള് സ്വീകരിക്കേണ്ടതുണ്ട്.