2026-ലെ ആദ്യ സൂര്യഗ്രഹണം ഫെബ്രുവരി 17 ചൊവ്വാഴ്ച നടക്കും. ചന്ദ്രൻ സൂര്യനെ ഭാഗികമായി മറയ്ക്കുകയും സൂര്യപ്രകാശം ഒരു തിളങ്ങുന്ന വളയമായി ദൃശ്യമാവുകയും ചെയ്യുന്ന 'റിംഗ് ഓഫ് ഫയർ' അഥവാ വലയ സൂര്യഗ്രഹണമാണ് അന്നേ ദിവസം സംഭവിക്കുക.ഇന്ത്യയില് ഈ പ്രതിഭാസം കാണാൻ കഴിയില്ലെങ്കിലും അന്റാർട്ടിക്കയിലാണ് ഇതിന്റെ പൂർണ്ണരൂപം ദൃശ്യമാകുക. കൂടാതെ ദക്ഷിണാഫ്രിക്ക, ദക്ഷിണ അമേരിക്ക തുടങ്ങിയ പ്രദേശങ്ങളിലെ ചില ഭാഗങ്ങളില് ഭാഗിക ഗ്രഹണം ദൃശ്യമാകും.
സൂര്യന്റെ 96 ശതമാനത്തോളം ഭാഗം ചന്ദ്രൻ മറയ്ക്കുന്ന ഈ വിസ്മയം ഏകദേശം രണ്ട് മിനിറ്റിലധികം നീണ്ടുനില്ക്കുമെന്നാണ് കണക്കാക്കുന്നത്. എന്നാല് ഈ അപൂർവ്വ പ്രതിഭാസം ദൃശ്യമാകുന്ന സ്ഥലങ്ങള് മനുഷ്യവാസം കുറഞ്ഞതും എത്തിച്ചേരാൻ പ്രയാസമുള്ളതുമായ ഗവേഷണ മേഖലകളാണ്.
സുരക്ഷാ മുൻകരുതലിന്റെ ഭാഗമായി, ഗ്രഹണം നിരീക്ഷിക്കുന്നവർ സൂര്യനെ നേരിട്ട് നോക്കാതെ സോളാർ ഫില്റ്ററുകളോ ഐ.എസ്.ഒ മാനദണ്ഡമുള്ള പ്രത്യേക കണ്ണടകളോ ഉപയോഗിക്കണമെന്ന് വിദഗ്ധർ മുന്നറിയിപ്പ് നല്കുന്നു.