മലയാറ്റൂരില് കാമുകൻ കൊലപ്പെടുത്തിയ ബിരുദ വിദ്യാർത്ഥിനിയായിരുന്ന ചിത്രപ്രിയയുടെ പോസ്റ്റ്മോർട്ടം റിപ്പോർട്ട് പുറത്ത്.യുവതിയുടെ തലയ്ക്കേറ്റ ഗുരുതര പരിക്ക് കാരണമാണ് മരണം സംഭവിച്ചതെന്നാണ് റിപ്പോർട്ടിലുള്ളത്. ആന്തരിക രക്തസ്രാവം ഉണ്ടായെന്നും ചിത്രപ്രിയയുടെ തലയില് അടിയേറ്റതിന്റെ ഒന്നില് കൂടുതല് പാടുകള് ഉണ്ടെന്നും റിപ്പോർട്ടില് വ്യക്തമാക്കുന്നുണ്ട്. ശരീരത്തില് പിടിവലിയുടെ പാടുകളും ഉണ്ടായിരുന്നു.
ശനിയാഴ്ച വൈകിട്ട് മുതലാണ് ചിത്രപ്രിയയെ കാണാതായത്. ഇതിനിടയില് അലനൊപ്പം ചിത്രപ്രിയ ബൈക്കില് പോകുന്നതിന്റെ സിസിടിവി ദൃശ്യങ്ങള് പൊലീസിന് ലഭിച്ചിരുന്നു. ഞായറാഴ്ച പുലർച്ചെ 1.53നുള്ള ദൃശ്യങ്ങളാണ് ഇവ.പെണ്കുട്ടിയെ കാണാതായെന്ന വിവരം ലഭിച്ചതിനെത്തുടർന്ന് സിസിടിവി ദൃശ്യങ്ങള് പരിശോധിച്ച പൊലീസ് അലനെ വിളിച്ചുവരുത്തി ചോദ്യം ചെയ്തു. പെണ്കുട്ടിയെ പ്രദേശത്ത് ബൈക്കില് കൊണ്ടുവിട്ടതാണെന്നാണ് തുടക്കത്തില് ഇയാള് പറഞ്ഞത്. തുടർന്ന് പൊലീസ് വിട്ടയയ്ക്കുകയും ചെയ്തു. പിന്നീട് ചിത്രപ്രിയയുടെ മൃതദേഹം കണ്ടെത്തിയതോടെ അലനെ വീണ്ടും വിളിപ്പിക്കുകയായിരുന്നു.