തളിപ്പറമ്പ്: പ്രേമരോഗിയെ കൊണ്ട് പൊറുതിമുട്ടി തളിപ്പറമ്പ് താലൂക്ക് ഗവ.ആശുപത്രിയിലെ ഡോക്ടറും ആശുപത്രി ജീവനക്കാരും പോലീസും.
ഒരു പ്രമുഖ സ്‌പെഷ്യലിസ്റ്റ് ഡോക്ടറാണ് പ്രേമരോഗിയുടെ പരാക്രമങ്ങള്‍ക്ക് ഇരയായിക്കൊണ്ടിരിക്കുന്നത്.
ആശുപത്രിയില്‍ കുറച്ചനാളുകള്‍ക്ക് മുമ്പാണ് സംഭവങ്ങളുടെ തുടക്കം.
ഡോക്ടറെ കാണിക്കാനായി എത്തിയ ശ്രീകണ്ഠാപുരം സ്വദേശിനിയായ ഒരു യുവതിക്ക് ഡോക്ടറോട് അനുരാഗം തോന്നുന്നു.
പരിശോധനയുടെ ഭാഗമായി തന്നെ ഡോക്ടര്‍ സ്പര്‍ശിച്ചത് അനുരാഗവിലോചനനായിട്ടാണെന്ന് രോഗിയായ യുവതിക്ക് തോന്നി.
അടുത്തവരവിന് യുവതി ഡോക്ടര്‍ക്ക് തന്റെ ഇംഗിതം അറിയിക്കാനായി ഒരു പ്രേമലേഖനം നല്‍കുന്നു.
എന്നാല്‍ യുവതിയുടെ യഥാര്‍ത്ഥ രോഗം പിടികിട്ടിയ ഡോക്ടര്‍ പ്രേമലേഖനം ഡ്യൂട്ടിയിലുണ്ടായിരുന്ന നേഴ്‌സിനെ കാണിക്കുന്നു.പ്രേമരോഗം കലശലായ യുവതി ആഴ്ച്ചയില്‍ രണ്ടുദിവസവും ഒ.പിയുള്ള ഡോക്ടറെ കാണാനായി സ്ഥിരമായി എത്തിത്തുടങ്ങി.എന്നാല്‍ തന്റെ പ്രേമം ഏശുന്നില്ലെന്ന് വന്നതോടെ പ്രതികാര ദുര്‍ഗയായ യുവതി ഡോക്ടര്‍ തന്നെ മോശമായ വിധത്തില്‍ സ്പര്‍ശിച്ചു എന്ന് കാണിച്ച് തളിപ്പറമ്പ് പോലീസില്‍ പരാതി നല്‍കുന്നു.
യുവതി ശല്യം ചെയ്യുന്നതായി കാണിച്ച് ഡോക്ടര്‍ തളിപ്പറമ്പ് ഡി.വൈ.എസ്.പിക്കും പരാതി നല്‍കി.പരാതി പ്രകാരം അന്വേഷണം നടത്തിയ എസ്.ഐ ദിനേശന്‍ കൊതേരിക്ക് ഡോക്ടര്‍ യുവതി നല്‍കിയ പ്രേമലേഖലം ഉള്‍പ്പെടെ കൈമാറി.
എസ്.ഐ യുവതിയെ വിളിച്ചുവരുത്തി ഉപദേശിക്കുകയും ബന്ധുക്കളെ വിളിച്ച് കാര്യങ്ങള്‍ പറയുകയും ചെയ്തു.
ഇതോടെ യുവതി എസ്.ഐക്കെതിരെ തിരിഞ്ഞു. പരാതിയുമായി എത്തിയ തന്നെ എസ്.ഐ ഭീഷണിപ്പെടുത്തുന്നു എന്നതായി അടുത്ത പരാതി.എസ്.ഐക്കെതിരെ പോലീസിന്റെ ഉന്നതങ്ങളിലും യുവതി പരാതിയുമായി എത്തി.ജില്ലയിലെ ചില രാഷ്ട്രീയപാര്‍ട്ടി നേതാക്കളെയും യുവതി നേരിട്ട് വിളിച്ച് പരാതിപ്പെട്ടു.
എസ്.ഐ കാര്യങ്ങള്‍ എല്ലാവരേയും ബോധ്യപ്പെടുത്തിയെങ്കിലും യുവതി തന്റെ പ്രേമപോരാട്ടം തുടര്‍ന്നുകൊണ്ടിരിക്കുന്നത് പോലീസിനും ആശുപത്രി അധികൃതര്‍ക്കും തലവേദനയായിരിക്കയാണ്.
ഇത് എങ്ങിനെ കൈകാര്യം ചെയ്യണമെന്നറിയാതെ നട്ടംതിരിയുന്ന പോലീസും ആശുപത്രി അധികൃതരും ഡോക്ടറും യുവതിയുടെ അടുത്ത നീക്കം എന്താണെന്ന ആശങ്കയിലാണ്.ഈ പ്രോമരോഗിയെ ആര്‍ക്ക് തളയ്ക്കാന്‍ കഴിയുമെന്നാണ് പോലീസും ആശുപത്രി അധികൃതരും ചോദിക്കുന്നത്.