ഇടുക്കി: ആനച്ചാലിൽ വിനോദസഞ്ചാരികൾ ഡൈനിങിൽ കുടുങ്ങിയ സംഭവത്തിൽ കേസെടുത്തു. വെള്ളത്തൂവൽ പൊലീസാണ് സ്വമേധയാ കേസെടുത്തത്. സ്ഥാപന ഉടമ ചിറക്കൽപുരയിടത്തിൽ വീട്ടിൽ സോജൻ ജോസഫിനെ ഒന്നാം പ്രതിയാക്കിയാണ് കേസെടുത്തത്. മറ്റൊരു ഉടമ ചീനിക്കുഴി സ്വദേശി പ്രവീൺ രണ്ടാം പ്രതിയാകും.
ആവശ്യമായ സുരക്ഷാ സംവിധാനങ്ങൾ ഇല്ലാതെയാണ് സതേൺ സ്കൈസ് എയറോ ഡയനാമിക് പ്രവർത്തിച്ചിരുന്നത് എന്നാണ് പൊലീസ് നിഗമനം.
സ്ഥാപനം പൊതുജന സുരക്ഷയ്ക്ക് വീഴ്ച വരുത്തിയെന്നും എഫ്ഐആറിൽ പറയുന്നു. ഇന്നലെ ഒന്നര മണിക്കൂറിലധികമാണ് കുട്ടികളടക്കമുള്ളവർ ഡൈനിങിൽ കുടങ്ങിയത്.
രണ്ടും നാലും വയസ്സുള്ള കുഞ്ഞുകൾ ഉൾപ്പെടെ അഞ്ച് പേർ സ്കൈ ഡൈനിങിൽ ഉണ്ടായിരുന്നു. നാലരമണിക്കൂർ നീണ്ട സാഹസിക രക്ഷാപ്രവർത്തനത്തിനൊടുവിൽ അഗ്നിരക്ഷാസേന എത്തിയാണ് അഞ്ചുപേരെയും സുരക്ഷിതമായി താഴെയിറക്കിയത്.
സംഭവത്തിൽ ജില്ലാ കളക്ടർ തഹസിൽദാറോട് റിപ്പോർട്ട് തേടിയിരുന്നു. സ്ഥാപനത്തിന് സ്റ്റോപ്പ് മെമ്മോ നൽകും. പ്രവർത്തനം താൽക്കാലികമായി നിർത്തിയിരിക്കുകയാണ്. വിശദമായ പരിശോധനയ്ക്ക് ശേഷം മാത്രം സ്ഥാപനം തുറന്നുപ്രവർത്തിക്കാനാകൂ.
സ്ഥാപനത്തിൻ്റെ രേഖകൾ ഉടമകൾ ഇന്ന് തഹസിൽദാരുടെ ഓഫീസിൽ ഹാജരാക്കും.
കേരളത്തിൽ അത്ര പ്രചാരമില്ലാത്ത സാഹസിക വിനോദമാണ് സ്കെ ഡൈനിങ്. 150 അടി ഉയരത്തിൽ ഇരുന്ന് കാഴ്‌ചകൾ കണ്ടു ഭക്ഷണം കഴിക്കാം. ഒരുമാസം മുമ്പാണ് പ്രദേശത്ത് സ്കെ ഡൈനിങ് പ്രവർത്തനം ആരംഭിച്ചത്.